У час Першай сусветнай вайны сям’я Валасевічаў была ў бежанцах. У 1915 годзе выехала на тэрыторыю Расіі, апынулася на Кубані. Іван Валасевіч скончыў 7 класаў няпоўнай сярэдняй школы. Пачаў працаваць вучням токара, а затым токарам на заводзе. Ініцыятыўнага, стараннага, здольнага хлопца накіравалі на рабфак, пасля заканчэння якога накіравалі ў геолагаразведачны інстытут.
У 1931 годзе партарганізацыя інстытута накіравала Івана Валасевіча ў ваенную школу пілотаў імя А. Ф. Мянікова, якую ён паспяхова скончыў у 1932 годзе. Служыў на Чарнаморскім, а з 1937 года – Балтыйскім флатах. У 1939 годзе быў прызначаны памочнікам камандзіра эскадрыллі.
Ваенкам 13-ай асобнай знішчальнай авіяцыйнай эскадрыллі (61-я знішчальная авіяцыйная брыгада, ВПС Балтыйскага флоту) старшы палітрук І. І. Валасевіч падчас савецка-фінляндскай вайны 1939–1940 гадоў праявіў сябе бясстрашным лётчыкам і ўмелым палітработнікам. Здзейсніў 69 баявых вылетаў, збіў 4 самалёты, знішчыў 7 агнявых кропак праціўніка.
За ўзорнае выкананне баявых заданняў 13-я АЗАЭ 61-й ЗАБ ВПС Балтыйскага флоту была ўзнагароджана ордэнам Чырвонага Сцяга. За мужнасць, адвагу і геройства, праяўленыя ў барацьбе з фінамі, Указам Прэзідыума Вярхоўнага Савета СССР ад 21 красавіка 1940 годаІ. І. Валасевіч удастоены звання Героя Савецкага Саюза з уручэннем ордэна Леніна і медалі «Залатая Зорка».
У час Вялікай Айчыннай вайны служыў у складзе 32-га знішчальнага авіяцыйнага палка, быў намеснікам камандзіра эскадрыллі. Са жніўня 1941 года – намеснік камандзіра 11-га знішчальнага авіяцыйнага палка ВПС Чарнаморскага флоту. 30 верасня 1941 года Іван Іванавіч Валасевіч загінуў пры выкананні баявога задання.
Імя героя носіць вуліцы ў пасёлку Нафтагорск Апшаронскага раёна Краснадарскага краю, ў г. Бярозе і ў в. Ціхны Бярозаўскага раёна. У 1975 годзе на радзіме ў в. Ціхны была ўстаноўлена мемарыяльная дошка.
Матэрыял падрыхтаваны ў 2014 г. Бярозаўскай цэнтральнай раённай бібліятэкай. В. С. Віскова, галоўны бібліёграф, К. А. Ляўковіч, метадыст аддзела бібліятэчнага маркетынгу
-
Валасевіч Іван Іванавіч // Беларуская энцыклапедыя : у 18 т. Мінск, 1996. Т. 3. С. 472.
-
Мемориальная доска Волосевичу Ивану Ивановичу // Свод памятников истории и культуры Белоруссии. Брестская область. Минск, 1990. С. 129.
-
Селеня, Е. В. Страницы пламенной жизни / Е. В. Селеня // Память : историко-документальная хроника Берёзовского района. Минск, 1987. С. 292–294.
-
Герои Советского Союза : краткий биографический словарь / пред. ред. коллегии И. Н. Шкадов. Москва : Воениздат, 1987. Т. 1. С. 283.
-
Волосевич Иван Иванович // Их именами названы… : энцикл. справочник. Минск, 1987. С. 120.
-
Золотые звезды политработников / сост. Ю. Е. Кузнецов. Курган : КВВПАУ, 1984.