На чарговую сустрэчу прыйшло больш за 30 чалавек сталага ўзросту, на вачах якіх прайшла гісторыя роднага горада, адбыліся змены ў ім. На сустрэчу ў якасці «цікавага чалавека» быў запрошаны Валерый Савасціёнак, маларытчанін, неабыякавы да свайго роднага горада. Валерый Антонавіч пазнаёміў прысутных з выставай «Маларыта: фотаздымкі мінулага», якая ўжо некалькі тыдняў экспануецца ў чытальнай зале, і падрабязна расказаў пра сваё захапленне. Ён ужо працяглы час збірае фотаздымкі, звязаныя з мінулым горада і раёна. У прыватнай калекцыі Валерыя Савасціёнка іх ужо больш за 10 тысяч. Частку з сабраных фотаздымкаў цяпер можна ўбачыць на сайце «FotoMalorita» па адрасе ў інтэрнэце: http://fotomalorita.by.
Уся праца, звязаная са стварэннем сайта «FotoMalorita», папярэднічае выпуску «Народнага фотаальбома аб Маларыце». Плануецца, што ён выйдзе ў свет у 2016 г.
Падчас сустрэчы Валерый Савасціёнак паказаў некаторыя фотаздымкі, пракаменціраваў іх. У тых, хто сабраўся ў чытальнай зале, было што ўспомніць і абмеркаваць.
Напрыканцы сустрэчы чытачоў чакаў яшчэ адзін сюрпрыз: Валерый Савасціёнак праспяваў некалькі песень пад гітару.