31 сакавіка 2021 г. у Брэсцкай абласной бібліятэцы імя М. Горкага адбыўся міжнародны круглы стол «Лукаш Дзекуць-Малей: прадаўжальнік справы Скарыны», прымеркаваны да 100-годдзя пачатку дзейнасці ў Брэсце грамадскага і рэлігійнага дзеяча, выдаўца, перакладчыка,  дабрачынца, і 90-годдзя выдання перакладу Бібліі на беларускую мову. Мэта круглага стала — асэнсаванне яго ўнёску ў агульную гісторыка-культурную спадчыну Беларусі і Брэстчыны. Галоўнай падзеяй стала прэзентацыя новага зборніка навуковых артыкулаў «Лукаш Дзекуць-Малей: пастар, які працягнуў справу Скарыны», які выйшаў у свет у 2021 г. у выдавецтве «Пазітыў-цэнтр», з удзелам аўтараў. Кніга складаецца з апублікаваных у перыяд з 1975 да 2018 г. пятнаццаці артыкулаў дзевяці даследчыкаў. На сённяшні дзень гэта толькі другая кніга ў беларускай гістарыяграфіі, прысвечаная асобе Л. Дзекуця-Малея. У зборніку таксама ўтрымліваецца багаты матэрыял па краязнаўстве Брэстчыны.

Круглы стол прайшоў у афлайн- і анлайн-фарматах. Небяспечная эпідэмічная сітуацыя не дазволіла запрасіць для ўдзелу ў мерапрыемстве ўсіх жадаючых. Прагучалі анлайн-даклады вядомых навукоўцаў Алены Глагоўскай, прафесара ўніверсітэта Казіміра Вялікага ў г. Быдгашчы (Польшча), Ёханэса Раймера, прафесара па місійных даследаваннях і міжкультурнай тэалогіі ўніверсітэта прыкладных навук г. Эверсбаха (Германія), а таксама прамых нашчадкаў Л. Дзекуця-Малея з г. Гданьска (Польшча). У працы круглага стала прынялі ўдзел гісторыкі Брэсцкага дзяржаўнага ўніверсітэта імя А. С. Пушкіна, Брэсцкага дзяржаўнага тэхнічнага універсітэта, краязнаўцы, спецыялісты па гісторыі пратэстантызму ў Беларусі.

Краязнавец І. М. Чайчыц прадставіў невядомыя раней дакументы пра Л. Дзекуця-Малея з фонду Дзяржаўнага архіва Брэсцкай вобласці. Былі прадстаўлены таксама арыгіналы Бібліі на беларускай мове ў перакладзе Л. Дзекуця-Малея ўсіх гадоў выдання (1931, 1948, 1985, 1991). Заг. аддзела краязнаўчай літаратуры і бібліяграфіі Жэлянгоўская Ірына прэзентавала выставу дакументаў з фондаў бібліятэкі «Лукаш Дзекуць-Малей і Беларусь: асоба ХХ стагоддзя».

Удзельнікі круглага стала пазнаёміліся з музейна-выставачнай экспазіцыяй аддзела рэдкай кнігі, у якую ўваходзяць рэдкія і каштоўныя выданні па гісторыі Беларусі і Брэстчыны.

Верамчук Ларыса Эдуардаўна,

намеснік дырэктара па сацыякультурнай і інфармацыйнай рабоце

Кантактны тэлефон: +375 162 43 45 25

11 сакавіка 2021 г. у аддзеле краязнаўчай літаратуры і бібліяграфіі Брэсцкай абласной бібліятэкі імя М. Горкага прайшла прэзентацыя кнігі гістарычных нарысаў Мікалая Аляксандрава «Брест на перекрёстках уникальных судеб».

Наш горад стаў скрыжаваннем лёсаў многіх людзей. Некаторыя з іх тут нарадзіліся, іншыя былі праездам, трэція праславілі родны горад. «Брест на перекрёстках уникальных судеб» — кніга пра знакамітых землякоў. Яе аўтар больш за дваццаць гадоў па крупінках збіраў матэрыял для гэтых нарысаў у дзяржаўных і хатніх архівах, сустракаючыся з відавочцамі падзей або іх нашчадкамі.

Мікалай Аляксеевіч — таленавіты журналіст, выдатны гісторык, цудоўны паэт... З усімі гранямі яго творчасці можна было пазнаёміцца з дапамогай кніжнай выставы, падрыхтаванай супрацоўнікамі бібліятэкі. Сярод выданняў, прадстаўленых на ёй, — зборнікі паэзіі Мікалая Аляксеевіча «Кварта» (Брэст, 2002), «Долгий путь в Китеж» (Брэст, 2009), публікацыі ў літаратурных зборніках: «Истоки» (Масква, 1987), «Поэзия русского слова» (Мінск, 2019), «Небесная река» (Разань, 2017), паэтычная падборка з біяграфічнай даведкай у кнізе Леаніда Валасюка «Непрыдуманыя партрэты» (Брэст, 2014) і інш.

Шэраг публікацый Мікалая Аляксандрава прысутныя маглі прачытаць у літаратурным альманасе Саюза беларускіх пісьменнікаў «Жырандоля». Акрамя паэтычных падборак у ім друкаваліся эсэ, прысвечаныя Мікалаю Чурабу і Дзмітрыю Карбышаву. Экспазіцыя знаёміла з публікацыямі аўтара ў часопісах «Молодая гвардия», «Родина», ксеракопіямі артыкулаў з газеты «Брестский курьер», прысвечаных некаторым персаналіям, чые лёсы раскрываюцца ў прэзентуемай кнізе.

Аўтар распавёў аб працы над кнігай, паказаў відэапрэзентацыю сваіх даследаванняў — старыя эксклюзіўныя фотаздымкі берасцейцаў з каментарамі аб іх лёсах.

Жэлянгоўская Ірына Іванаўна,

заг. аддзела краязнаўчай літаратуры і бібліяграфіі

Кантактны тэлефон: +375 162 57 48 79

У аддзеле краязнаўчай літаратуры і бібліяграфіі Брэсцкай абласной бібліятэкі імя М. Горкага распачала сваю працу кніжная выстава «Творы і творцы», прысвечаная
40-гадоваму юбілею Брэсцкага абласнога аддзялення грамадскага аб’яднання «Саюз беларускіх пісьменнікаў».

Яно ўтварылася 13 студзеня 1981 г. Першым кіраўніком стаў таленавіты вучоны, літаратуразнаўца, прафесар Брэсцкага педагагічнага інстытута імя А. С. Пушкіна Уладзімір Андрэевіч Калеснік. Першапачаткова ў склад аддзялення ўваходзілі 11 пісьменнікаў: Уладзімір Калеснік, Іван Арабейка, Мікола Бусько, Зінаіда Дудзюк, Мікола Пракаповіч, Міхась Рудкоўскі, Святлана Курылёва, Алесь Каско, Ніна Мацяш, Алег Мінкін, Васіль Сахарчук. У розныя гады творчую суполку ўзначальвалі: Мікола Пракаповіч, Алесь Каско, Ніна Мацяш, Іван Мельнічук, Мікола Аляхновіч. На сённяшні дзень абласное аддзяленне налічвае 39 літаратараў.

На выставе прадстаўлены асобныя кнігі ўсіх членаў пісьменніцкай суполкі, сярод якіх шэраг выданняў з аўтографамі. У асобны раздзел выдзелены літаратурны альманах абласнога аддзялення «Жырандоля», заснаваны ў 2008 г. славутай пісьменніцай і перакладчыцай Н. І. Мацяш. На сённяшні дзень выйшаў ужо яго дванаццаты нумар.

Берасцейшчына багата на літаратурныя таленты. Сёння пісьменніцкую суполку прадстаўляюць творцы, якія працуюць у розных жанрах: паэзія, проза, драматургія. Нашы пісьменнікі-землякі пішуць як для дарослых, так і для дзяцей. Даволі плённа працуюць у жанры перакладу.

Экспазіцыя праілюстравана рэдкімі фотаздымкамі з жыцця і творчай дзейнасці аддзялення: разнастайныя літаратурныя сустрэчы і вечарыны ў розных гарадах Беларусі, стасункі з іншымі беларускімі пісьменнікамі і выступленні перад аўдыторыямі і г. д.

Кніжная выстава «Творы і творцы» будзе дзейнічаць на працягу студзеня і лютага 2021 г. Запрашаем усіх жадаючых азнаёміцца з матэрыяламі экспазіцыі і далучыцца да жывой крыніцы мастацкага слова.

Жэлянгоўская Ірына Іванаўна,

заг. аддзела краязнаўчай літаратуры і бібліяграфіі

Кантактны тэлефон: +375 162 57 48 79

Здитово — это самый древний населённый пункт в Берёзовском районе, впервые упоминается в 1252 г. в Ипатьевской летописи. В январе 1940 г. был создан Берёзовский район, в состав которого вошла д. Здитово.

Чытачы і супрацоўнікі Брэсцкай абласной бібліятэкі імя М. Горкага віншуюць з 70-гадовым юбілеем таленавітага беларускага мастака-ювеліра, заслужанага дзеяча мастацтваў Рэспублікі Беларусь Мікалая Кузьміча. Мікалай Пятровіч працуе ў галіне ювелірнага мастацтва, у тэхніцы гарачых эмаляў. Уваходзіць у пяцёрку лепшых майстроў у свеце, якія працуюць у гэтай унікальнай тэхніцы. Займаецца вырабам мастацкіх твораў, аб’ектаў і ювелірных упрыгожанняў.