На экспазіцыі прадстаўлены дакументы і матэрыялы з кніг, ілюстраваных альбомаў, даведнікаў, навуковых даследаванняў, якія раскрываюць шматгранную культурную прастору рэгіёна. Асобны акцэнт на выставе зроблены на дзейнасці Брэсцкага гарадскога цэнтра культуры, які з'яўляецца сапраўдным сэрцам сучаснага творчага жыцця горада і галоўнай пляцоўкай для самадзейных мастацкіх сіл рэгіёна. Таксама наведвальнікі выставы змогуць пазнаёміцца з гісторыяй і сучаснай дзейнасцю вядучых музеяў краю — ад гераічнай хронікі Брэсцкай крэпасці-героя і старажытных таямніц «Бярэсця» да велічных палацавых комплексаў у Ружанах і Косаве. Асобны блок прысвечаны развіццю кніжнай культуры і сучасных бібліятэк, дзе асаблівае месца займаюць дакументы аб Брэсцкай абласной бібліятэцы, у тым ліку і выдадзеныя намаганнямі самой установы. Тэатральнае жыццё і мастацкі патэнцыял вобласці раскрываюцца праз выданні, прысвечаныя творчаму шляху Брэсцкага акадэмічнага тэатра драмы і Брэсцкага тэатра лялек, а таксама праз буклетныя хронікі славутых музычных і танцавальных калектываў Палесся. Завяршае панараму яскравы агляд фестывальнага руху Брэстчыны, дзе сабраны матэрыялы пра Міжнародны тэатральны форум «Белая Вежа», «Студзеньскія музычныя вечары» і інш.

Сёння Берасцейшчына з'яўляецца адным з галоўных культурных цэнтраў краіны. У рэгіёне дзейнічае шырокая сетка музеяў, тэатраў і бібліятэк, культура ўвасабляецца ў шматлікіх гісторыка-культурных помніках, помніках архітэктуры, музейных калекцыях і інш. Брэстчына валодае невычэрпным творчым патэнцыялам і багатымі традыцыямі. Кніжная экспазіцыя «Прафесія — служыць Культуры» — гэта спроба паказаць унікальны гістарычны шлях лакальнай культуры і выказаць шчырую падзяку сучасным прафесіяналам, якія працуюць у тэатрах, музеях, бібліятэках, школах мастацтваў і сельскіх клубах рэгіёна.

Брэсцкая абласная бібліятэка імя М. Горкага віншуе ўсіх, хто абраў прафесію, якая захоўвае культурную спадчыну нашай краіны і жадае аптымізму, новых творчых ідэй і натхнення для іх увасаблення!