18 лютага ў Белаазёрскай дзіцячай бібліятэцы прайшоў урок мужнасці “Жил-был мальчик в городе Белоозёрске…”, на якім прысутнічалі вучні 6 класа СШ № 3. Аповед суправаджаўся электроннай прэзентацыяй “Эхо Афганской войны”.

Супрацоўнікі бібліятэкі пазнаёмілі дзяцей з гістарычнымі падзеямі вайны ў Афганістане, распавялі пра тое, як гераічна і прафесійна выконвалі свой доўг нашы салдаты, праяўлялі мужнасць, стойкасць, высакароднасць. Юныя чытачы пазнаёміліся з кнігамі “Памяць”, “На линии огня”, “Афганское эхо” Г. Сакалоўскага, у якіх можна знайсці імёны тых, хто загінуў у баявых дзеяннях. Адным з іх быў і наш зямляк Сяргей Казінец. Дзеці ўважліва слухалі невядомыя факты пра салдата. Імем Казінца была названа вуліца ў Белаазёрску і  адзін з лепшых атрадаў у СШ № 3. Імя Казінца залічана ў спісы курсантаў Талінскага мараходнага вучылішча. Імя героя высечана на мемарыяльнай дошцы, прысвечанай воінам-інтэрнацыяналістам.

Да Дня памяці воінаў-інтэрнацыяналістаў 14 лютага ў Жабінкаўскай цэнтральнай раённай бібліятэцы прайшла прэзентацыя кутка афганца “Подвиг и память Афганистана”. Гэтая экспазіцыя – сумесная праца супрацоўнікаў ЦРБ і АГА “БСВВА” Жабінкаўскага раёна, своеасаблівая справаздача аб праведзенай рабоце за апошнія 2 гады. Яе мэта – расказаць маладому пакаленню аб ураджэнцах краю, якія выпрабавалі на сабе смяротны колазварот Афганскай вайны, спазналі сапраўдную каштоўнасць жыцця і баявога братэрства і увекавечанне памяці воінаў, якія загінулі ў Афганістане.

11 лютага ў чытальнай зале Бярозаўскай ЦРБ прайшоў медыя-ўрок мужнасці “Сыны отваги, доблести и чести”, прысвечаны Дню памяці воінаў-інтэрнацыяналістаў.

Увазе гледачоў былі прадстаўлены:

- слайд-прэзентацыя “Живая память”;

- тэматычныя відэаролікі;

- выстава-памяць “Боль необъявленной войны”.

Асаблівая ўвага была нададзена землякам: як салдатам, так і афіцэрам.

На выставе былі прадстаўлены партрэты 9 воінаў-афганцаў, ураджэнцаў Бярозаўскага раёна, якія загінулі ў Афганістане: Л. М. Буранко,У. І. Галаўко, І. Д. Жуковіч, В. К. Карпук, С. С. Казінец, П. І. Казінец, В. А. Макарэвіч, У. І. Сыцько,І. В. Тышкевіч. Моладзь даведалася, што іх імёнамі названы вуліцы Бярозы і Белаазёрска. Данінай памяці ўдзельнікам падзей таксама стаў духоўна-патрыятычны комплекс у г. Бяроза.

15 студзеня ў гарадскім Доме культуры адбылося свята, прысвечанае 76-годдзю Жабінкаўскага раёна і адкрыццю Года культуры, у рамках якога Жабінкаўская цэнтральная раённая бібліятэка падрыхтавала кніжную выставу «На перекрёстке лет».

Выстава складалася з трох раздзелаў, цэнтральны з якіх — «Жабинковщина: вчера, сегодня, завтра». Ён складаўся з фотадакументаў, кніг і артыкулаў перыёдыкі, якія распавялі прысутным аб гісторыі і сучаснасці Жабінкаўскага раёна ва ўсіх сферах жыцця: культуры, вытворчасці, сельскай гаспадарцы, адукацыі, літаратуры.

«Молодёжь читает» – раздзел, прысвечаны папярэдняму Году моладзі, прадстаўлены кнігамі сучасных папулярных аўтараў: Я. Вішнеўскага, П. Каэлья, Э. Сафарлі, Д. Браўна і класікаў: А. Пушкіна, Л. Талстога, Ф. Дастаеўскага. Асаблівасцю яго сталі фатаздымкі сусветных «зорак» з іх любімымі кнігамі: А. Блум зачытваецца кнігамі Ф. Дастаеўскага, Дж. Клуні – «Вайной і мірам» Л. Талстога, Б. Акунін – «Трыма мушкецёрамі» А. Дзюма.

«Мир культуры» – апошні раздзел выставы. На ім можна было азнаёміцца з кнігамі, у якіх адлюстроўваецца культурная спадчына Беларусі: жывапіс, музыка, тэатр, кіно, бібліятэкі, народная творчасць.

3 кастрычніка галоўны бібліятэкар чытальнай залы літаратуры па краязнаўстве І. П. Дрэкоўская аформіла кніжную выстаўку «Добрый наставник и друг», прысвечаную Дню настаўніка. Наведвальнікам прапанавана тэматычная падборка дакументаў краязнаўчага характару, прысвечаная прафесійнаму святу педагогаў.

16 кастрычніка 2015 г. распачала сваю дзейнасць выстаўка творчых работ «Яркие краски лета» дзіцячай студыі дэкаратыўнага мастацтва пад кіраўніцтвам Ірыны Літвінюк (чытальная зала літаратуры па мастацтве ЦГБ імя В. П. Таўлая). Прадстаўлены працы ў розных тэхніках акварэльнага жывапісу. На адкрыцці выстаўкі адбылося ўрачыстае ўзнагароджанне граматамі і салодкімі медалямі таленавітых маленькіх землякоў. 

22 кастрычніка бібліятэкар Н. М. Кіпель правяла з пяцікласнікамі СШ № 7 краязнаўчы ўрок «Помнікі – вехі гісторыі». Урок прайшоў у форме віртуальнай экскурсіі па вуліцах Баранавічаў. Бібліятэкар распавяла пра гісторыю стварэння некаторых гарадскіх помнікаў, засяродзіла ўвагу на знакамітых асобах, рэчах і падзеях, памяць аб якіх яны ўвекавечваюць.

23 кастрычніка ў Баранавіцкай ЦГБ адбыўся вечар-сустрэча «Жыццёвыя і творчыя вандроўкі Аляксея Белага», прысвечаны паэту, мастаку, намесніку дырэктара Выдавецкага дома «Інтэкс-прэс» Аляксею Беламу. Прысутныя пачулі аповед Аляксея Ільіча пра няпростыя жыццёвыя сцежкі, якія прывялі ўраджэнца в. Міхнавічы Івацэвіцкага раёна ў наш горад, пра тое, як нараджаюцца вершы і карціны, якое месца займае ў жыцці творцы сям’я і работа. Супрацоўнікі чытальнай залы літаратуры па краязнаўстве падрыхтавалі аднайменную электронную прэзентацыю пра жыццёвы і творчы шлях таленавітага гараджаніна. Гучалі вершы Аляксея Белага ў аўтарскім выкананні і ў выкананні калег і сяброў паэта – як новыя, так і вядомыя, з яго паэтычных зборнікаў «Каляровыя сны», «Боскі вецер правінцыі», «Тридцать второе августа», «Невольничьи песни», «Кветкі ў стагах». Да мерапрыемства ў чытальнай зале быў аформлены міні-вернісаж мастацкіх работ – карцін, фатаграфій вітражоў, створаных рукамі паэта-мастака.